Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Հունիսի 2-ին Կ.Պոլսից Մայր Աթոռ Սուրբ Էջմիածին վերադարձան Մայր Աթոռի Հրատարակչական բաժնի տնօրեն Տ. Նաթան եպիսկոպոս Հովհաննիսյանը եւ Երեւանի Ս. Գրիգոր Լուսավորիչ մայր եկեղեցու հոգեւոր տեսուչ Տ. Անուշավան եպիսկոպոս Ժամկոչյանը, ովքեր Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի օրհնությամբ օրեր առաջ մասնակցեցին Կոստանդնուպոլսի հայոց պատրիարքության հիմնադրման 550-ամյակին նվիրված միջոցառումներին:

Այս առիթով մայիսի 29-ին, Կ. Պոլսի Ս. Աստվածածին աթոռանիստ եկեղեցում, պատրիարքական ընդհանուր փոխանորդ Տ. Արամ արքեպիսկոպոս Աթեշյանի կողմից մատուցված Ս. Պատարագի ընթացքում Տ. Նաթան եպիսկոպոս Հովհաննիսյանը հրապարակեց Ամենայն Հայոց Կաթողիկոսի սրբատառ կոնդակը, որում մասնավորաբար ասվում է.

ՙԼուսո խորան Մայր Աթոռ Սուրբ Էջմիածնից Կոստանդնուպոլսի Հայոց Պատրիարքության հիմնադրման 550-ամյակի առիթով Հայրապետական Մեր օրհնությունն ու շնորհավորանքներն ենք հղում Կոստանդնուպոլսի Հայոց Պատրիարք Ամենապատիվ Տ. Մեսրոպ Արքեպիսկոպոս Մութաֆյանին, Պատրիարքական Ընդհանուր Փոխանորդ Գերաշնորհ Տ. Արամ Արքեպիսկոպոս Աթեշյանին, զինվորյալ միաբանությանն ու հոգեւոր սպասավորներին, Պատրիարքության խնամքի ներքո գտնվող հավատավոր հայորդիներին եւ աշխարհասփյուռ զավակներին քրիստոսասեր մեր ժողովրդի:

Այսօր մեր հայրերի աղօթքով գոհություն ենք մատուցում Տիրոջը, որ մեզ էլ կանչեց լինելու Աստուծո ժողովուրդ, Սուրբ Եկեղեցի: Տիրոջ հրաշափառ հարությունից եւ համբարձումից հետո, երբ առաքյալները, զորացած Սուրբ Հոգով, Նրա պարգեւած փրկության հաղթական ավետիսը տարածեցին աշխարհում, Աստուծո ողորմության լույսը ծագեց նաեւ մեր երկրում: Մեր առաջին լուսավորիչներ Սուրբ Թադեւոս եւ Բարդուղիմեոս առաքյալների քարոզության շնորհիվ մեր ժողովուրդը ճաշակեց ճշմարիտ աստվածճանաչողության պտուղները` դառնալով ՙի խաւարէ ի լոյս, ի մահուանէ ի կեանս, յապականութենէ յանապականութիւն, յանգիտութենէ ի գիտութիւն ճշմարտութեան իւրոյ՚:

Հայաստանը դարձավ քրիստոնեական աշխարհի կենտրոններից մեկը: Սրբազան մեր երկրում, ուր մեծ ջրհեղեղից հետո հանգրվանել էր Նոյյան Տապանը, ուր նշխարներն էին Տիրոջ առաքյալների եւ բազմաթիվ սուրբ վկաների, ուր հասել էին տերունական սուրբ մասունքներ, անհուն բարձունքներից իջած Տերը հաստատեց Սուրբ Էջմիածինը, լուսանկար մեր Մայր Աթոռը: Գրիգոր Լուսավորիչ Սուրբ Հայրապետի ՙԵկայք շինեսցուք սուրբ զխորանն լուսոյ՚ պատգամով կառուցվեցին բազմաթիվ եկեղեցիներ ու վանքեր` որպես փրկության տապաններ հայ ժողովրդի: Բարձրյալի օրհնության ներքո Հայ Եկեղեցին զորացավ, բարեբեր եղավ առատ պտուղներով` դարեր շարունակ Հայրենիքում եւ Սփյուռքում հովվելով եւ խնամելով Տիրոջ ժողովրդին:

Հայ Եկեղեցու առաքելության ճանապարհին նշանակալի հանգրվան եղավ Կոստանդնուպոլսի Հայոց Պատրիարքության հիմնադրումը 1461 թվականին, որով սկիզբ առավ Թուրքիո հայության ազգային ու եկեղեցական կյանքի նոր վերազարթոնքը: Պատրիարքության հոգեւոր իշխանության ներքո, որ տարածվեց մեր Հայրենիքի գերակշիռ մասի վրա, վերածնվեցին հնագույն վանքերը, դարձան հայ կյանքի կենտրոններ, նրանց հովանու ներքո ստեղծվեց ազգային, հոգեւոր ու մշակութային սքանչելի ժառանգություն, որն այսօր էլ շարունակում է հարստացնել ազգային-եկեղեցական կյանքը մեր ժողովրդի: Կոստանդնուպոլսի Հայոց Պատրիարքական Աթոռի նվիրյալ եկեղեցականներ, ինչպիսիք էին Հայոց Հայրապետական գահին բազմած Մատթեոս Ա, Գեւորգ Դ, Մկրտիչ Ա եւ Մատթեոս Բ Կաթողիկոսները, Հովհաննես Կոլոտ, Հակոբ Նալյան, Ներսես Արք. Վարժապետյան, Մաղաքիա Արք. Օրմանյան, Եղիշե Արք. Դուրյան, Գարեգին Արք. Խաչատուրյան, Շնորհք Արք. Գալուստյան Պատրիարքները, բազմաթիվ վաստակյալ ազգային, մշակութային գործիչներ անձնվիրաբար ծառայեցին մեր ժողովրդի առաջընթացին ու հարատեւությանը: Հազարավոր մեր եկեղեցիներն ու վանքերը, պատմամշակութային բազմահազար հուշարձան-կոթողները, ձեռագիր ու տպագիր գրքերը, արվեստի եւ գիտության ձեռքբերումները խոսուն վկաներն են Պատրիարքության ժառանգության:

Կոստանդնուպոլսի Հայոց Պատրիարքությունը իր բոլոր նվաճումներով ու ամուր ավանդներով եղել եւ այսօր էլ շարունակում է լինել հայ կյանքի նշանավոր կենտրոններից մեկը: Դուք, Կոստանդնուպոլսի Հայոց Պատարիարքության սիրելի հավատավոր ժողովուրդ, մեր նախնյաց օրինակով անխախտ եք պահպանում ազգային ու հոգեւոր ձեր կյանքի նվիրական արժեքները, դժվարին պայմանների մեջ հոգ տանում եկեղեցիների ու ազգային հաստատությունների պայծառությանը: Մենք սիրով հիշում ենք Հովվապետական Մեր այցելությունը Կոստանդնուպոլսի Հայոց Պատրիարքություն, երբ գոհունակությամբ ականատես դարձանք, թե որքան ջերմ սիրով է պոլսահայությունը կապված Առաքելական մեր Սուրբ Եկեղեցուն, Սուրբ Էջմիածնին, Հայրենիքին ու ահհհհ հայրենական սրբություններին: Այսօր Կոստանդնուպոլսի Հայոց Պատրիարքության հիմնադրման մեծ հոբելյանը անցյալի վերարժեւորմամբ հոգեւոր նորոգության եւ ազգային միասնականության ամրապնդման նոր հրավեր է ձեզ եւ համայն մեր ժողովրդին: Անսասան մնացեք առ Աստված հավատի ու հույսի մեջ, զորացեք եղբայրասիրությամբ եւ ձեր կյանքը հարստացրեք նոր, աստվածահաճո գործերի արգասիքներով:

Մեր աղոթքն ու մաղթանքն է, որ Բարին Աստված հաստատուն ու պայծառ պահպանի Կոստանդնուպոլսի Հայոց Պատրիարքությունը, հավատով զորացյալ` հոգեւոր սպասավորներին եւ ազգային գործիչներին, բարեպաշտ ողջ ժողովրդին` առավել ծաղկեցնելու մեր Եկեղեցու օրհնյալ անդաստանը` ի փառս մեր Տիրոջ` Հիսուս Քրիստոսի, Հայ Եկեղեցու եւ հայ ժողովրդի: